-
హైదరాబాద్ శివారులో ఘనంగా వివాహ వేడుక
-
వెంకటేశ్ బంధువుల అమ్మాయి శివానీతో ఏడడుగులు
-
కుటుంబంతో కలిసి హాజరై సందడి చేసిన యంగ్ టైగర్ ఎన్టీఆర్
యంగ్ టైగర్ ఎన్టీఆర్ బావమరిది, టాలీవుడ్ యువ నటుడు నార్నే నితిన్ వివాహ బంధంలోకి అడుగుపెట్టారు. శివానీ అనే యువతితో ఆయన పెళ్లి శుక్రవారం రాత్రి అంగరంగ వైభవంగా జరిగింది. హైదరాబాద్ శివారులోని శంకర్పల్లిలో జరిగిన ఈ వేడుకకు సినీ, రాజకీయ రంగాలకు చెందిన ప్రముఖులు పెద్ద సంఖ్యలో హాజరయ్యారు. ఈ వివాహానికి జూనియర్ ఎన్టీఆర్ తన సతీమణి లక్ష్మీ ప్రణతి, కుమారులు అభయ్ రామ్, భార్గవ్ రామ్లతో కలిసి హాజరై ప్రత్యేక ఆకర్షణగా నిలిచారు.
వధువు వివరాలు:
వధువు శివానీ నెల్లూరు జిల్లాకు చెందిన వెంకట కృష్ణ ప్రసాద్, స్వరూప దంపతుల కుమార్తె. ఆమె కుటుంబానికి రాజకీయ నేపథ్యం ఉంది. ముఖ్యంగా, ఆమె టాలీవుడ్ సీనియర్ హీరో దగ్గుబాటి వెంకటేశ్కు బంధువుల అమ్మాయి కావడం ఈ వివాహానికి మరింత ప్రాధాన్యతను తీసుకొచ్చింది. దీంతో ఈ పెళ్లి సినీ, రాజకీయ వర్గాల్లో ఆసక్తిని రేకెత్తించింది. గత ఏడాది నవంబర్ 3న నితిన్, శివానీల నిశ్చితార్థం హైదరాబాద్లో జరిగింది.
నార్నే నితిన్ సినీ ప్రయాణం:
నార్నే నితిన్ “మ్యాడ్” సినిమాతో 2023లో హీరోగా పరిచయమై, తొలి చిత్రంతోనే మంచి గుర్తింపు పొందారు. ఆ తర్వాత “ఆయ్”, “మ్యాడ్ స్క్వేర్” వంటి చిత్రాలతో వరుస విజయాలు అందుకుని ఇండస్ట్రీలో తనకంటూ ఓ స్థానాన్ని సంపాదించుకున్నారు. ఇటీవలే “శ్రీశ్రీశ్రీ రాజావారు” సినిమాతో ప్రేక్షకులను పలకరించారు.
సోషల్ మీడియాలో సందడి:
ప్రస్తుతం నితిన్-శివానీల పెళ్లికి సంబంధించిన ఫొటోలు, వీడియోలు సోషల్ మీడియాలో వైరల్ అవుతున్నాయి. నూతన దంపతులకు శుభాకాంక్షలు తెలుపుతూ నెటిజన్లు, అభిమానులు పెద్ద ఎత్తున పోస్టులు పెడుతున్నారు. దీంతో #NarneNithinWedding అనే హ్యాష్ట్యాగ్ సోషల్ మీడియాలో ట్రెండింగ్లో ఉంది.
Read also : Samsung : గెలాక్సీ M17 5G: సామాన్యుల కోసం శాంసంగ్ నుంచి కొత్త బడ్జెట్ 5G ఫోన్!
